انا رانيا خطاب أهلاً بيكم في قناتني. هنا حكايات الفن زمان
لو بتحب الفن المصري القديم، وبتحنّ لأيام الزمن الجميل، فأنت وصلت للمكان الصح.
هنا هنرجع مع بعض لأجمل ذكريات السينما والتليفزيون والمسرح، وهنحكي حكايات الفنانين اللي عاشوا بينا وفضلوا موجودين في قلوبنا لحد النهارده.
📖هتلاقوا عندنا قصص حياة الفنانين والفنانات. رحلة النجوم من البداية لحد الشهرة. 🎬 حكايات وكواليس من عالم السينما والتليفزيون والمسرح. 💔 قصص النجاح والفشل والحب والفراق. 🔎 أسرار وحكايات قديمة عن نجوم الزمن الجميل. 📺 معلومات عن الفنانين اللي يمكن تكون أول مرة تعرفها. ❤️ وذكريات أعمال وشخصيات محفورة في ذاكرة الجمهور.
هدفنا إننا نحافظ على ذاكرة الفن المصري ونرجّعكم لأيام وذكريات جميلة يمكن تكون غابت عنكم، ونعرّف الأجيال الجديدة بنجوم صنعوا تاريخ الفن المصري.
لو بتحب فاتن حمامة، شادية، عبد الحليم حافظ، رشدي اباظه كل نجوم الزمن الجميل… اشترك في القناة وخليك معانا في رحلة بين الماضي والحاضر.
🔔 اشترك وفعل الجرس عشان يوصلك كل جديد من حكايات نجوم الفن المصري.
هنا مش بس بنحكي عن الفنانين… إحنا بنرجّع ذكرياتهم للحياة
رانيا خطابRania Khattab
«وأنا في السجن.. عادل إمام كان الفنان الوحيد اللي زارني»
من أصعب الحاجات على الإنسان إنه يلاقي نفسه في مكان عمره ما تخيل إنه هيدخله، خصوصًا لما يكون اسمه معروف والناس كلها بتتكلم عن قضيته.
وده بالضبط اللي حصل مع الفنان الراحل حاتم ذو الفقار، اللي حكى عن زيارة إنسانية جدًا من الفنان عادل إمام، وفضلت محفورة في ذاكرته لسنين طويلة.
حاتم قال إنه في يوم حد، حوالي الساعة التاسعة والنصف الصبح، لقى حد بيصحيه وبيقوله:
«الفنان عادل إمام جاي يزورك.. هيكون هنا الساعة عشرة ونص، فإنت يادوبك تقوم وتظبط نفسك وتستقبله».
وفعلًا، في الموعد جه عادل إمام، ومعاه شقيقه عصام إمام، والصحفي شريف وفرافيرو.
وأول ما عادل شاف حاتم، ما بدأش بكلام كتير ولا حاول يتعامل معاه باعتباره متهم أو واحد موجود في السجن.. لكنه كلمه كصديق وأخ.
وقال له:
«شد حيلك.. وأنا عارف إنك راجل. القضية شكلها خدت رأي عام، بس اللي مكتوب عليك هتشوفه ولازم ترضى بيه.. يا إما هتروح في سكة تانية أنا مش عايزك تروح فيها كأخ. أنا بحبك وشايف فيك حاجة كويسة».
الكلام ده كان له تأثير كبير جدًا على حاتم، خصوصًا إن علاقته بعادل إمام ما كانتش مجرد علاقة بين فنان كبير وفنان أصغر منه.
عادل كان بالفعل مؤمن بموهبته، وسبق واداله فرص كويسة، وكان شايف فيه حاجة تستحق إنه يقف جنبه، مش بس كفنان، لكن كإنسان.
وقعد عادل مع حاتم فترة طويلة، من حوالي الساعة إلا ربع لحد الساعة واحدة وربع.
حاتم قال إنه من فرحته بوجود عادل معاه، ماكانش واخد باله من الوقت ولا من أي حاجة حواليه.
لكن بعد فترة، جه واحد من المساجين وقال له:
«السجن مقفول يا أستاذ حاتم.. والعيال خلاص هتضج».
ساعتها حاتم فهم إن إدارة السجن كانت قافلة العنبر على المساجين، علشان محدش يخرج ناحية البوابة اللي في النص، واللي بتوصل لأوضة المأمور، مكان الزيارة.
ولما عادل عرف اللي حصل، اتضايق جدًا، وقال:
«كان لازم يبلغوني! إزاي يعملوا كده؟ هو أنا جاي أزورك ولا جاي أضايق الناس؟»
وبعدها حاول يخفف عن حاتم، وقعد يهزر معاه ويتكلم معاه، وكأنه عايز يخرجه ولو للحظات من الجو الصعب اللي كان عايش فيه.
وفي نهاية الزيارة، أصر عادل إمام كمان إنه يسيب له فلوس في الكانتين.
زيارة ممكن ناس تشوفها مجرد زيارة لفنان لفنان تاني، لكن بالنسبة لحاتم ذو الفقار كانت أكبر من كده بكتير.
لأن الإنسان في أصعب لحظات حياته، مش دايمًا بيفتكر مين قال له كلام كتير.. لكنه بيفتكر مين وقف جنبه، ومين حاول يطمنه، ومين خلاه يحس إنه لسه إنسان وليه قيمة.
وعشان كده فضلت زيارة عادل إمام محفورة في ذاكرة حاتم ذو الفقار..
مش بس لأن نجم كبير زي عادل إمام راح له لحد السجن..
لكن لأنه في وقت كان حاتم فيه محتاج كلمة تسنده، سمع منه ببساطة:
«أنا بحبك.. وشايف فيك حاجة كويسة».
2 weeks ago | [YT] | 996
View 51 replies
رانيا خطابRania Khattab
موقف طريف بين أم كلثوم وإسماعيل يس
كانت أم كلثوم في واحدة من زياراتها للإسكندرية، وكانت بصحبة الشاعر أحمد رامي والملحن رياض السنباطي، وهناك قابلوا بالصدفة الفنان إسماعيل يس، في إحدى الصيدليات بمنطقة محطة الرمل.
وبعد ما سلموا على بعض واتبادلوا التحية، لفت نظر أم كلثوم إن إسماعيل يس واقف جنب الميزان الآلي، فسألته عن وزنه، فقال لها بكل ثقة:
«زي الفل.. 78 كيلو بس، لا غير!»
وهنا اتفاجئت كوكب الشرق وقالت له:
«مش معقول! لازم تكون اتوزنت من غير بقك!»
فضحكوا كلهم جامد، لكن إسماعيل يس أصرّ إنها هي كمان تتوزن.
أم كلثوم رفضت، خصوصًا بعد ما حذرها أحمد رامي منه، وقال لها إنه معروف بسرعة البديهة وخفة الدم، وإنه أكيد عايز يرد لها المقلب في نفس اللحظة.
ولما إسماعيل يس لاحظ ترددها وبعدها رفضها إنها تطلع على الميزان، ما ضيعش الفرصة، ورد عليها بسرعة وقال:
«أكيد سيبتي صوتك في مصر، وخايفة تتوزني من غيره!»
وهنا ما قدرش حد يمسك نفسه من الضحك، وكانت أم كلثوم نفسها أول واحدة ضحكت على الإفيه.
الله يرحمهم
2 weeks ago | [YT] | 171
View 6 replies
رانيا خطابRania Khattab
ريحة الصبح وذكريات الزمن الجميل
ريحة الصبح زمان كانت ليها طعم تاني…
طعم عمره ما هيرجع، مهما كبرنا ومهما اتغيرت الدنيا. ❤️📻
إحنا الجيل اللي كان يومه بيبدأ بدري… يمكن الساعة 6 الصبح، والبيت كله لسه هادي، لكن صوت الراديو كان سابق الكل.
كنا بنصحى على صوت الإذاعي الكبير فاروق شوشة، وصوت برنامجه الشهير «لغة العصر»، أو على موسيقى «قطرات الندى» اللي كانت بتفتح النفس على يوم جديد، وكأن الصباح نفسه كان بيقول لنا: صباح الخير… قوموا وابدأوا يومكم.
وبعدها ييجي صوت أم كلثوم من الراديو، وهي بتغني: «يا صباح الخير يا اللي معانا… الكروان غنى وصحانا».
وصوتها كان كفيل يخلي الصبح له روح تانية.
وبعدين يطلع لنا الصوت الدافي الجميل لـ محمد قنديل: «يا حلو صبح… يا حلو طل… يا حلو صبح نهارنا فل».
نلبس هدوم المدرسة، ونجهز الشنطة، وننزل الشارع… وهناك كانت الحكاية بتكمل.
العربيات، والمحلات، والراديوهات… كلها كانت بتملأ الشوارع بصوت برنامج «صاحبتك السلامة»، ومعاه التتر الجميل بصوت آيات الحمصاني: «بالسلامة يا حبيبي بالسلامة».
وكان فيه صوت تاني كفيل يخلينا نعرف إننا اتأخرنا على المدرسة خلاص! 😄
صوت فؤاد المهندس في برنامجه الشهير «كلمتين وبس».
صوت كان مرتبط عندنا بالصباح، وبالضحكة، وبأيام المدرسة، وبزمن كان أبسط بكتير من دلوقتي.
وإحنا نفس الجيل اللي كان بيستنى يوم الجمعة علشان «سينما الأطفال»… نستنى ونقعد قدام التليفزيون مستنيين الحكاية تبدأ.
والجيل اللي كان بيسرح بخياله وهو بيتابع «جولة الكاميرا» يوم الأحد مع الإذاعية الكبيرة هند أبو السعود.
والجيل اللي كان البيت كله بيسكت لما يبدأ «العلم والإيمان» للدكتور مصطفى محمود… لحظات كان فيها للتليفزيون هيبة، وللكلمة معنى.
وإحنا الجيل اللي كان مصدق إن ماما نجوى إبراهيم فعلًا ممكن تزعل من «بقلظ» وتأنبه لما يعمل حاجة غلط! 😂❤️
وكمان كنا بنستنى مسابقات «بم بم»، ونشتري ونحل ونحاول نكسب… وكانت المسابقة نفسها جزء من فرحتنا.
أما رمضان… فده كان حكاية تانية خالص.
كنا بنستنى الفوازير، ونعيش مع سحر «ألف ليلة وليلة»، وننبهر بكل مشهد وكل ديكور وكل تفصيلة من إبداع المخرج الكبير الراحل فهمي عبد الحميد.
كان زمن بسيط… لكن ذكرياته كانت كبيرة.
زمن مكنش فيه موبايلات، ولا إنترنت، ولا مئات القنوات… لكن كان فيه راديو، وتليفزيون، وشريط كاسيت، وشارع مليان ناس، ولمة عيلة، وذكريات بتتخزن جوانا من غير ما نحس.
يمكن إحنا مش بنشتاق للبرامج والأغاني والأفلام بس…
إحنا بنشتاق لنفسنا وإحنا صغيرين.
بنشتاق لصباحات كانت بتبدأ بصوت الراديو، ولمدرسة كنا بنجري عليها، ولبيت كان فيه صوت الضحك، ولأيام كنا فاكرين إنها عادية… واكتشفنا بعد سنين إنها كانت من أجمل أيام العمر.
يا ريت الزمن يرجع بينا يوم واحد بس…
نصحى بدري، نفتح الراديو، ونسمع «يا صباح الخير يا اللي معانا»… ونحس إن الدنيا لسه بخير. ❤️
لو كنت من الجيل ده، قول لنا: إيه أكتر صوت أو برنامج أو أغنية كانت مرتبطة عندك بصباح زمان؟ 📻❤️
2 weeks ago | [YT] | 182
View 26 replies
رانيا خطابRania Khattab
فاكرين يوم الخميس زمان؟
اليوم اللي كان ليه طعم تاني خالص… كأن الأسبوع كله كان بيستناه عشان يفرّغ فيه كل فرحته.
كنا بنصحى يوم الخميس وإحنا عارفين إن النهارده مفيش مدرسة بكرة… يعني مفيش استعجال، ومفيش منبّه هنقوم عليه بدري، ومفيش حد هيقول لنا: يلا نام عشان عندك مدرسة الصبح.
وكمان كان الخميس ليه طقوسه الخاصة…
من أول الصبح، البيت بيبقى فيه حركة مختلفة.
ريحة الأكل طالعة من المطبخ، والأمهات بتجهز للغدا، والبيت نفسه تحس إنه لابس هدوم العيد.
وكنا نرجع من المدرسة بدري، نرمي الشنطة في أي ركن، وننزل نجري على الشارع.
لا موبايل يشغلنا…
ولا ألعاب إلكترونية تحبسنا في البيت…
ولا حتى حد كان محتاج يخطط لنا يومنا.
كورة في الشارع، عجلة، استغماية، نط الحبل، وخناقات صغيرة نتصالح بعدها بخمس دقايق!
وكان أجمل إحساس إننا عارفين إن بكرة الجمعة أجازة…
يعني الليلة طويلة، واللعب ملوش آخر.
ويا سلام بقى على الخميس بالليل…
العيلة كلها تتجمع، والتليفزيون القديم يبقى هو بطل السهرة.
نستنى فيلم السهرة، وكل واحد ماسك طبق لب أو سوداني، والبيت كله هادي ودافي.
ممكن الفيلم يكون اتعاد عشر مرات…
ومع ذلك نتفرج عليه كأننا بنشوفه لأول مرة.
كان فيه حاجات بسيطة جدًا، لكن كانت بتعمل فرحة كبيرة.
تليفزيون قديم… قعدة عيلة… طبق لب… فيلم أبيض وأسود… وضحكة طالعة من القلب.
إحنا مش وحشاننا الخميس بس…
إحنا وحشانَا الإحساس اللي كان مرتبط بالخميس.
وحشانَا وقت كانت الفرحة فيه سهلة…
مش محتاجة فلوس كتير، ولا سفر، ولا خروجة غالية، ولا موبايل جديد.
كان يكفينا إن باب البيت مفتوح، والشارع مليان أطفال، والجيران عارفين بعض، والناس بتسأل على بعضها.
يمكن علشان كده لما نفتكر الخميس القديم، بنحس إننا مش بنفتكر يوم من أيام الأسبوع…
إحنا بنفتكر جزء من عمرنا.
بنفتكر ناس كانوا موجودين وبقوا غايبين…
بيوت كانت مليانة، وبقت ساكتة…
وشوارع كانت بتضحك بأصوات الأطفال، وبقت أهدى من زمان.
والسؤال اللي بيفضل جوا القلب:
مين اللي سرق مننا يوم الخميس؟
هل هو الزمن؟
ولا العمر اللي جري بينا من غير ما نحس؟
ولا المسؤوليات اللي كبرت معانا؟
ولا الناس اللي مشيت من حياتنا؟
يمكن الحقيقة إن محدش سرق الخميس…
إحنا اللي كبرنا.
كبرنا لدرجة إن الخميس نفسه مبقاش زي زمان، لأننا بقينا نشوف الدنيا بعين مختلفة.
بس مهما كبرنا، هيفضل جوا كل واحد فينا طفل صغير…
مستني يوم الخميس،
عايز يرمي الشنطة في الركن، وينزل يجري في الشارع، ويرجع بالليل يقعد جنب أهله…
ويستنى فيلم السهرة.
يمكن الخميس القديم اختفى…
لكن ذكراه لسه عايشة جوانا. 🤍🏡
3 weeks ago | [YT] | 433
View 70 replies
رانيا خطابRania Khattab
اليوم عيد ميلادي 💛
💛👑 𝐈𝐭'𝐬 𝐌𝐲𝐁𝐢𝐫𝐭𝐡𝐝𝐚y
🍂اللهُم إنني قد رضيتُ بكُل ما أردتهُ لي في عامِي الماضِي💛
فأرضنِي فِي عَامي الجَديد بفرَح وجَبر مِن حيثُ لا أحتسِب .🌻
🍂اللهُم إني استودعُك بعُمري خَيراً ، فاغفُر لِي مَا مضَى وبَارك لِي فِيما هَو آتٍ .
اللّٰهـم عامـاً دون فقـد و دون حـزن و دون خيبـه اللّٰهـم عامـاً يتحقـق فيـه گـل ما أتمنى
🌹🌹اتمني كل سنه اكتب بوست عيد ميلادي وانا وسطكم اخواتي وصاحبي وكل متابعين قناتي المحترمين ✨🌿
🖇
🍂اهَــلا بـعامِي الـجديد
🍂وبما إن انهارده عيد ميلادي مبحبش بوست عيد ميلادي يكون م غير هدية وأجمل هدية ممكن حد يقدمها ليا هي دعوه حلوه م القلب 🌻🦋💛
🌿💯كن لطيف يا سبتمبر ف فيك التقط اول انفاسي
4 weeks ago (edited) | [YT] | 241
View 90 replies
رانيا خطابRania Khattab
قبل عودة المدارس قولنا إيه أكتر مسلسل بيفكرك بأيام الدراسة ؟
ضمير ابلة حكمت ، يوميات ونيس ، هند والدكتور نعمان
1 month ago | [YT] | 317
View 32 replies
رانيا خطابRania Khattab
🚨 ممنوع دخول مواليد الألفينات… الاختبار ده للكبار فقط! 😂
لو كنت من جيل الثمانينات، والتسعينيات جاوب من غير ما تفكر:
📺 إيه اسم البرنامج اللي كنت بتجري عليه أول ما تسمع موسيقته؟
📞 لما التليفون الأرضي يرن الساعة 11 بالليل…
كنت بتفرح ولا بتقول: "يا ساتر… مين اللي مات؟!" 😂
🍞 لما أمك تقولك:
"انزل هات عيش"
وترجع تلاقيها بتقول:
"وأنت نازل ليه؟ ما أنا كنت هبعت أخوك!" 🤣
🎮 ولما الكهرباء تقطع وإنت بتتفرج على أحلى فيلم…
كنت بتبص للسقف وتقول:
"ليه يا رب؟ أنا عملت إيه؟!" 😂
بس السؤال الحقيقي…
إزاي كنا عايشين من غير موبايل، ولا إنترنت، ولا سوشيال ميديا… وكنا مبسوطين؟!
يمكن السر إننا كنا بنقعد مع بعض بدل ما نقعد جنب بعض وكل واحد ماسك موبايله. ❤️
1 month ago | [YT] | 384
View 33 replies
رانيا خطابRania Khattab
ياترى حد يعرف صاحبة الصورة دى ويعرف والدها وشقيقها الفنانين رحمة الله عليهم أجمعين 🌹🌹🌹
1 month ago | [YT] | 172
View 20 replies
رانيا خطابRania Khattab
بيوت زمان إلى كانت مليانه بالدفا والستر والبركه ❤️ مين لسه عنده الكنبه دى ؟
1 month ago | [YT] | 296
View 21 replies
رانيا خطابRania Khattab
أنا ببقي فخور و أنا بسلم عليه و بحس إني أخدت شيك بمليون جنيه لمًا بحط إيدي في إيده ، محمود المليجى عمل أدوار كان بيخلينى أنا و أنا عارف إن ده تمثيل أقعد أعيط من كتر ما هو عملاق ، بيتغلب على أي حاجة فى الدنيا ، و في رأيي هو أكبر و أهم من نجوم عالميين بما فيهم أنتوني كوين …
رشدي أباظة يتحدث في حوار إذاعي عن العبقري محمود المليجي
رحمهما الله و غفر لهما و أسكنهما الفردوس الأعلى من الجنة 🌹
منقول
1 month ago | [YT] | 252
View 10 replies
Load more