Taher Mohammed

"معاك بيرنج مقاسه X من SKF، وجبت لك بيرنج بنفس المقاس من مُصنّع مختلف. هل هتقبل بتركيبه؟"
ده كان سؤال اتسأل لزميل لنا في انترفيو، وكنت بفكر أعمل عنه فيديو قصير كده للتوضيح، بس أتمنى إن الكلام يوصل الفكرة اللي عاوز أوصلها...
في اختيار البيرينج، طبيعي جدًا إن العيون تروح للأبعاد: القطر الداخلي، القطر الخارجي، وعرض البيرينج.
لكن إجابة السؤال أوسع من كده، فتعالوا ناخدها واحدة واحدة.

*الخلوص الداخلي (Internal Clearances):
المُصنّع بيحدد لك إن المعدة دي هتستخدم لها بلي معين، وبيكون محدد للخلوص الداخلي للبلي ده نطاق سماحية معين.
طب إيه اللي ممكن يحصل لو استخدمت بلي بخلوص داخلي أقل من المطلوب؟
غالبًا هيؤدي إلى زيادة الاحتكاك وارتفاع درجة حرارة البلي، ومع الوقت ممكن يتسبب في تلفه.
طب لو الخلوص أكبر من الخلوص المطلوب؟
هنا فيه كذا حاجة ممكن تحصل، ولعل أبرزها زيادة حركة العمود أثناء الدوران؛ يعني بالعامية، العمود مبقاش محكوم في نطاقه الطبيعي، مع زيادة الاهتزاز طبعا وقلة العمر التشغيلي.

Dynamic Load ratings*
قيمة مرجعية تُستخدم لحساب العمر التشغيلي للبيرنج تحت الحمل الديناميكي. بس خلي بالك دا مؤشر وليس قيمة فعلية للحمل. فمينفعش تختار بيرينج قيمته أقل بدون الرجوع للمصنّع.

Static Load Ratings*
ده بقى مؤشر للحمل الساكن اللي البيرنج يقدر يتحمله والمعدة واقفة من غير ما يحصل تشوه دائم في عناصر البيرنج.
الشافت وهو ثابت بيشكل حمل على البيرنج، ولو البيرنج مش مصمم لتحمل الحمل ده، ممكن يحصل تشوه دائم أكبر من المسموح في منطقة التلامس.

Speed Ratings*
هنا بنفرق بين قيمتين مرجعيتين للسرعة:
Limiting speed
ودي السرعة القصوى التي لا ينبغي تجاوزها عند تشغيل البيرينج.
Reference speed
ودي بقى السرعة اللي عندها كمية الحرارة المتولدة بسبب الاحتكاك داخل البيرنج بتكون تقريبًا متساوية مع كمية الحرارة اللي البيرنج يقدر يتخلص منها.
بمعنى أبسط، هي مؤشر على الأداء الحراري للبيرنج عند ظروف تشغيلية معينة.

Material*
لازم تراجع نوع المادة وتتأكد من مطابقته للمواصفات المطلوبة لأن بعض المواد قد لا تتلاءم مع ظروف التشغيل، وده ممكن يؤدي مثلًا إلى التآكل أو التلف المبكر في حال استخدام ماتريال غير مناسبة.

Lubrication*
مش كل بيرنج بيحتاج تشحيم خارجي، لأن بعض الأنواع بتكون ذاتية التشحيم.

الخلاصة:
- لما تستبدل بيرنج بآخر، تشابه الأبعاد لا يعني بالضرورة إن البيرنجين متكافئين.
لازم تبص على الـ clearance, load ratings, speed ratings, material, lubrication وغيرها من المواصفات حسب التطبيق.
- تقدر تدخل على أي مانوال على موقع شركة SKF وتشوف قيم فعلية للحاجات اللي انا اتكلمت عنها بحيث تقرب لذهنك أكتر 👍

#Bearings
#Reliability_Mindest
#Maintenance

1 month ago | [YT] | 0